١- بتفتح خزانة المونة والبراد وبتشوف شو باقي..

٢- بتفتح جزدانك وبتشوف شو بعد فيك تشتري..

٣- بتفتح حنفية المي وبتشوف اذا فيك تشرب منها..

٤- الكهربا وباقي الامور.. ما تتعذب ما رح فيك تشوفها..

لما توصل عالشارع، سماع الناس شو عم تحكي.. عن المرض والدوا، عن المدارس والكتب، عن الودائع والبنوك، عن الليرة وانعدام قيمتها، عن الشغل والسفر، عن البنزين والمازوت.. عن الحاجة والسرقة من اجل الاكل، عن الموت والهجرة، عن الانهيار والفلتان الاخلاقي..

بمركز الاقتراع، شوف صور المرشحين وشوف كل واحد منهم لمين تابع وشو قدّم زعيمه للناس؟ واسأل حالك: اذا معلمه وصّلك لهون! هو لوين بدو يوصّلك؟؟

اذا شفت اعلام حزبية اسأل شو عمل هالحزب للمجتمع والناس ولوين وصّلهم؟ كيف غيّر حياة المواطنين للأفضل؟ كيف تعامل مع الناس؟ شو قدّم مشاريع حيوية وخدماتية وكم وظيفة أمّن، وكم مستشفى فتح، وكم مليار صرف على امور غير موجودة!! ما تغوص كتير بالتاريخ وانجازات اي حزب بالحرب والقتال والقضية والدفاع والحماية.. خلصت الحرب من ٣٢ سنة وتصالحوا على حسابنا، ويللي عملوه فينا بآخر ١٥ سنة ما بيعملوه حتى الاعداء بأشرس خصومهم..

جرّب تتذكر انفجار المرفأ وكيف تعرقل التحقيق فيه وليش،

جرّب تتذكر الشهدا وليش استشهدوا ومين قتلهم،

جرب تتذكر يللي تهجروا ومين هجّرهم..

جرّب تتذكر الودائع بالمصارف ومين سرقهم ولمين هالمصارف،

جرب تتذكر الحرائق بالصيف والطوفان بالشتا والنفايات بكل الاوقات.. تذكر انو في بلدية ما عم تشتغل لأنهم سرقوها..

ونصيحة، شو بدك بخطاباتهم عن المواجهة ما هني ويللي بدهم يواجهوهم شركاء وحلفاء وحاكمين البلد بالتكافل والتضامن.. مثلا ما في حدن منهم الا وعامل شراكة وحلف استراتيجي مع احد اعضاء الثنائي، والثنائي بذاتهم متحالفين ومرتبطين استراتيجياً ببعضهم!!

تذكر مقولة: ان حليف حليفي هو حليفي..

وتذكر دائماً انو يللي قتلك بالحرب ونهبك بالسلم مش رح يرحمك بالانهيار ورح يفرض عليك ضرائب ورسوم وخوّات ما بتنتهي.. ورح يستغلك كل العمر ليسدد من مالك ثمن كل سرقاته وثمن ثرواته بالداخل والخارج..

بعد كل هالامور، خود قرارك..

اذا لقيت حالك مرتاح وعاجبك الوضع وكل شي رواق.. انتخبهم هني ذاتهم..

اذا شايفهم حققوا إنجازات.. انتخب ازلامهم واتباعهم الموزعين على اللوائح وعم يستهبلونا بخبريات انو هني قادرين يحققوا يللي عجز عن تحقيقه زعيمهم بذاته!!

واذا حدن جرب يشوّش عليك بخبرية الزواج المدني.. رد عليه واسأله اذا وضعه اليوم بيسمح انو هو يتزوج او اذا قادر يزوّج اولاده او حتى يطعميهم قبل ما يحدد شو نوع الزواج.. وتذكر دائما انو المشكلة مش بأفكار او خيارات الناس انما بأفعال اهل السلطة وحاشيتهم وبطانتهم العاطلة..

اما اذا قررت تغيّر.. فصار عندك بديل..

لائحة بيروت التغيير

هي لائحة مؤلفة من اشخاص اشتغلوا سنوات في محاربة الفساد ومواجهة الظلم وتقديم الحلول والخطط والمشاريع للانقاذ والنهوض، اشخاص بيمثّلوا معظم قوى التغيير الموجودة في لبنان عندهم الامكانيات والطاقات للتغيير نحو الافضل، عندهم القدرة لمنع استمرار مسلسل ونهج النهب والقتل والتدمير والافلات من العقاب.

هاللائحة هي من ضمن حالة تغييرية منتشرة على مساحة الوطن، هي لائحة ولدت من رحم ثورة ١٧ تشرين، فيها من كل الألوان، اتحدوا ليكونوا صورة عن لبنان ولانقاذ لبنان من الفاسدين والزعران واعادة بناؤه ليكون احلى بلد بين البلدان.

برنامج اللائحة:

١- استعادة الحقوق: مواجهة، محاسبة، انقاذ.

٢- العنوان السياسي: سيادة، عدالة، مواطنة.

٢- الاطار الاصلاحي: بناء، تطوير، حوكمة.

٤- ترسيخ الهوية: تعددية، حريات، ديمقراطية.

٥- تمكين المواطن: وظائف، خدمات، استقرار.

برنامجنا بسيط وهادف ومركّز، رح نشتغل ليل نهار لتحقيقه بكل جرأة وشفافية، برنامج نابع من معاناة الناس، من حاجة الناس للعيش بكرامة وحرية وأمان من دون ذل وبهدلة وتهديد وترهيب، من رغبتهم بمحاسبة كل مين سرقهم وقتلهم وهجّرهم وضيّع مستقبلهم، من ارادتهم باعادة بناء بيروت واعمار مرفأها ومعاقبة يللي تسبب بتفجيره، من حاجتهم لفتح كل شوارعها وطرقاتها واعادة الحياة لاقتصادها والعدل لمحاكمها والاستقرار لمجتمعها والفعالية لمؤسساتها، وتحرير وتنظيف بحرها، وتطوير كل مرافقها الحيوية وتأمين كل الخدمات فيها، وخلق فرص العمل وتوفير السكن اللائق والتعليم المتطور والحياة الكريمة لكل ابنائها، وتحويلها مجددا الى اجمل عاصمة والى مركز للابداع والتفوق والتقدم.

برنامج لا في كفر ولا اي شي مسيء لحدن، بيحترم خصوصيات الجميع وبيحتاج بالتأكيد الى صوتك لينجح، صوتك الامانة يللي رح نحملها بكل اخلاص.

صوّت لـ #بيروت_التغيير

المرشح عن لائحة بيروت التغيير المحامي هاني الاحمدية